សហគមន៍អេកូទេសចរណ៍ជីផាតស្ថិតក្នុងភូមិជីផាត ឃុំជីផាត ស្រុកថ្មបាំងខេត្តកោះកុង មានចម្ងាយ ១២៦គ.មពីក្រុងខេមរភូមិន្ទ ភ្ញៀវទេសចរជាតិអន្តរជាតិអាចធ្វើដំណើរទៅកាន់តំបន់នោះតាមផ្លូវ ជាតិលេខ៤៨​ ត្រង់ចំណុចផ្លូវបំបែកហួសស្ពានអណ្តូងទឹកប្រហែល៥គ.មរួចបន្តដំណើរតាមផ្លូវគ្រួសក្រហម រហូតដល់ភូមិ ជីផាតតែម្តង។ សហគមន៍អេកូទេសចរណ៍ជីផាតបានបង្កើតឡើងក្នុងឆ្នាំ២០០៧ ក្រោមការជួយឧបត្ថម្ភគាំទ្រពី មូលនិធិអង្គការសម័្ពន្ធមិត្តសត្វព្រៃ​ និងមានការចូលរួមពីប្រជាជនក្នុងឃុំ ជីផាត(ភូមិជីផាត ភូមិកំលត ភូមិជាំសា្ល និងភូមិទឹកល្អក់) ក្នុងគោលបំណងការពារធនធានធម្មជាតិរក្សាតម្លៃវប្បធម៌ខ្មែរ និងលើកស្ទួយជីវភាពប្រជាជន អោយបានកាន់តែប្រសើរឡើងបន្ថែមទៀត ជាពិសេសផ្តល់ឱកាសអោយប្រជាជន ក៏ដូចជាភ្ញៀវទេសចរជាតិ អន្តរជាតិ បានចែករំលែកនូវបទពិសោធន៍គ្នាទៅវិញទៅមក ថែមទាំងបានផ្តល់នូវសិទ្ធិអំណាចដល់អាជ្ញាធរ ក្នុងការគ្រប់គ្រងអេកូទេសចរណ៍អាស្រ័យដោយសហគមន៍។ សហគមន៍អេកូទេសចរណ៍ជីផាតបច្ចុប្បន្នកំពុង ត្រូវបានចាត់ទុកជាតំបន់ទេសចរណ៍មួយដ៏សំខាន់ និងទាក់ទាញបំផុតសម្រាប់ភ្ញៀវមកធ្វើទេសចរណ៍បែបផ្សង ព្រេងសិក្សាស្រាវជ្រាវពីបូរាណវិទ្យា ប្រពៃណី វប្បធម៌ អរិយធម៌ និងធម្មជាតិនៃសត្វព្រៃជាដើម។ សហគមន៍ នេះត្រូវបានរាជរដ្ឋាភិបាលចាត់ទុកជាសហគមន៍គំរូ ហើយបានទទួលនូវជ័យលាភីពានរង្វាន់សម្តេចតេជោ សម្រាប់ធុរកិច្ចបៃតងក្នុងវិស័យទេសចរណ៍និងជ័យលាភីផ្ទះស្នាក់កម្ពុជា។ សក្តានុពលទេសចរណ៍សំខាន់ៗក្នុង តំបន់នេះមានៈ

1. តំបន់ពាង៧០ឬភ្នំពើង និងម្ឈូសបូរាណ
2. តំបន់ពាងបូរាណនិងម្ឈូសបូរាណភ្នំពេល
3. តំបន់ពាងបូរាណអូរកី
4. តំបន់ពាមតាខាត់
5. អូរស្ពាត
6. ភ្នំត្រង៉ោល
7. ឆាយអូសគូថ
8. វាលប្រាក់
9. ឆាយទឹកវេទ
10. ស្ទឹងព្រ័ត
11. ថ្មអណ្តែត
12. ដំណាក់ខូស
13. អូរពាមក្រវ៉ាញ