រមណីយដ្ឋានធម្មជាតិថ្វាក ជាកន្លែងដែលកំពុងពេញនិយមសម្រាប់ភ្ញៀវទេសចរជាតិ និងអន្តរជាតិ មកលេងទឹក និងសម្រាកកម្សាន្ត។ ចំណែកនៅរដូវប្រាំងវិញកម្រិតទឹករាក់ល្មមសម្រាប់ទេសចរអង្គុយលេង ក្នុងស្ទឹង លើថ្មរដេបរដុប ហើយទីនេះមានដើមឈើធំៗ ផ្ដល់ជាម្លប់ និងគុម្ពឫស្សីជាច្រើនដុះតាមច្រាំង ផ្លូវចូលទៅលេងអមទៅដោយខ្ចុះ ដែលសង់ឡើងសម្រាប់ភ្ញៀវសម្រាកកាយ។ ជាពិសេសទៅទៀតនោះកន្លែងកម្សាន្តនេះមាន ផ្ទៃទឹកហូររាបស្មើ និងមានទឹកហូរប្រជ្រៀតគ្នាតាមកន្លៀតថ្ម ធំ តូច គួរជាទីកម្សាន្តយ៉ាងមនោរម្យ។ រមណីយដ្ឋានធម្មជាតិថ្វាក មានចម្ងាយប្រហែល 49គីឡូម៉ែត្រ ពីទីរួមខេត្តបាត់ដំបង ដោយយើងធ្វើដំណើរចេញពីទីរួមខេត្តទៅតាមផ្លូវជាតិលេខ57។