ទឹកធ្លាក់ភ្នំ 53 ជាតំបន់ទេសចរណ៍ថ្មីមួយដ៏មានសក្ដានុពលនៅខេត្តបាត់ដំបង​ ​ខណៈដែលតំបន់នេះ មានទេសភាពយ៉ាងស្រស់ស្អាត និងព័ទ្ធទៅដោយជ្រលងភ្នំ ដែលគួរឲ្យចង់គយគន់។ បន្ថែមលើនេះ​ទៀត តំបន់នេះបានទាក់ទាញ ភ្ញៀវទេសចរជាតិនិងអន្ដរជាតិ មកលេងកំសាន្ដជាច្រើនកុះករ​ មិនថាថ្ងៃធម្មតា និងថ្ងៃឈប់សំរាកផ្សេងនោះទេ។ ជាពិសេសជាងនេះទៅទៀតនោះ ភ្ញៀវទេសចរដែលមកលេងកំសាន្ដនៅទឹកធ្លាក់ភ្នំ 53​នេះ អាចងូតទឹកលេងកម្សាន្ដ​ និងថែមតាំងអាចគយគន់មើលនូវទេសភាពធម្មជាតិយ៉ាងស្រស់ត្រកាល ព័ទ្ធជុំវិញទៅដោយជ្រលងភ្នំជាច្រើន។

ទឹកធ្លាក់ភ្នំ 53 មានចម្ងាយប្រហែល 131 គីឡូម៉ែត្រ​ពីសាលាខេត្តបាត់ដំបង​។​យើងអាចធ្វើដំណើរតាម ផ្លូវជាតិលេខ 57ឆ្ពោះទៅរកស្រុកសំពៅលូន លុះដល់ផ្លូវបំបែក យើងត្រូវបត់ឆ្វេងមកផ្លូវជាតិលេខ​ 59 រួចធ្វើដំណើរមកដល់ចំណុចភូមិភ្នំព្រឺក ក្នុងស្រុកភ្នំព្រឺក  យើង​នឹង​ឃើញ​មាន​ស្លាក​សញ្ញា​ទឹកធ្លាក់​៥៣ នៅ​ពី​ខាងឆ្វេង​ដៃ បន្ទាប់មកយើងគ្រាន់តែចូលទៅ​ដល់ទី​តាំង​ហ្នឹង ត្រឹមតែ​ជាង​2 ​គីឡូម៉ែត្រ​តែប៉ុណ្ណោះ។