សហគមន៍ទួលព័ន្ធតាឡីបឹងស្នេហ៍ ស្ថិតនៅក្នុងស្រុកបាភ្នំ ខេត្ដព្រៃវែង។ វាគឺជាជម្រកសត្វស្លាបជាច្រើនប្រភេទ ដែលកំពុងប្រមូលផ្តុំគ្នានៅក្នុងតំបន់នោះនាពេលបច្ចុប្បន្ន។ នៅទីនោះមានសត្វស្លាបប្រមាណពីរលានក្បាល។ ផ្ទៃដីតំបន់អភិរក្សសត្វស្លាបនេះមានទំហំជាង 100ហិកតា។ វាត្រូវបានក្រសួងបរិស្ថាន និងអជ្ញាធរខេត្តគ្រោងដាក់បញ្ចូលជាតំបន់អភិរក្សធម្មជាតិកាលពីចុងឆ្នាំ2019។ នៅពេលល្ងាច ហ្វូងសត្វស្លាបកម្រជាច្រើនប្រភេទ ហោះហើរស្រែកចេចចាចព្រោងព្រាតរំលេចដោយពណ៌ចម្រុះយ៉ាងស្រស់ស្អាតនៅលើដែនអាកាស។ រីឯសត្វស្លាបកម្រខ្លះទៀត បណ្ដែតខ្លួនប្រចឹកគ្នាលេងលើផ្ទៃទឹក បន្ទាប់ពីស្វែងរកចំណីនៅភូមិសាស្រ្ដផ្សេងៗ ហើយវិលមករកទ្រនំដ៏សុខសាន្ដ។ ទិដ្ឋភាពទាំងអស់នេះហើយដែលជាទស្សនីយភាពដ៏ស្រស់ត្រកាលគួរឱ្យចង់គយគន់ក្នុងតំបន់នេះ។