ម្ហូបដ៏ឆ្ងាញ់នៅប្រទេសកម្ពុជា និងរបៀបនៃការចម្អិនម្ហូបនៅតាមបណ្តារាជធានីខេត្ត

(សម្លរព្រោងឬសម្លរបុក)

គ្រឿងផ្សំ	បរិមាណ
សាច់គោ	៤០០ក្រាម
ស្លឹកផ្តៅ	៣០០ក្រាម
ត្រប់ស្រួយ	២០០ក្រាម
ប្រហុក	៥០ក្រាម
ស្លឹកក្រូចសើច	៥សន្លឹក
រំដែង	១ដុំតូច
អំបិល	១ស្លាបព្រាកាហ្វេ
ម្សៅស៊ុប	កន្លះស្លាបព្រាកាហ្វេ
ទឹកត្រី	១ស្លាបព្រាបាយ
ម្ទេស (បើត្រូវការ)	៥ផ្លែ

វិធីធ្វើ៖

ការរៀបចំសម្រាប់ការចម្អិន

១. លាងសម្អាតសាច់គោហើយហាន់ជាចំណិតស្តើងៗ

២. បកសំបកស្លឹកផ្តៅចេញយកតែបណ្តូលហើយកាត់វាប្រវែង៥សង់ទីម៉ែត្រ

៣. លាងសម្អាតត្រប់ស្រួយហើយហាន់វាជាបួន

៤. ចិតសំបករំដេងនឹងលាងសម្អាតស្លឹកក្រូចសើច

វិធីចម្អិន៖

ដាក់ដាំទឹកអោយពុះបន្ទាប់មកបង់ស្លឹកផ្តៅត្រប់ស្រួយសាច់គោរំដេងម្ទេសនិងស្លឹកក្រូចសើច។ដាំវាអោយពុះរហូតដល់ផុយសាច់(ប្រហែល២០នាទី)។

ស្រង់បន្លែនិងសាច់ចេញហើយដាក់ហើយបុកអោយហ្មត់

នៅពេលទឹកពុះហើយជញ្រ្ជំប្រហុកបង់អំបិលទឹកត្រីម្សៅស៊ុបបន្លែនិងសាច់ដែលបានបុកចូលរួចទុកអោយពុះ។

ចំណាំ៖សម្លរនេះត្រូវការប្រើប្រហុកនិងម្ទេសច្រើនដើម្បីអោយរស់ជាតិកាន់តែឆ្ងាញ់។

(បុកថ្គាម)

គ្រឿងផ្សំ	បរិមាណ
សាច់ផាត់(សាច់គោឬសាច់ជ្រូក)	៣០០ ក្រាម
ថ្គាម(ឈ្មោះបន្លែម្យ៉ាងរបស់ជនជាតិ)	៤០០ ក្រាម
ស្លឹកគ្រៃ	៥ គល់
ម្ទេស	៥០ ក្រាម
ខ្ទឹមស	១ កំពឹស
ខ្ទឹមក្រហម	៣ កំពឹស
ប្រហុក	៥០ ក្រាម
អំបិល	១ ស្លាបព្រាបាយ
ម្សៅស៊ុប	១ ស្លាបព្រាបាយ

វិធីធ្វើ:

ការរៀបចំសម្រាប់ការចម្អិន

១.កាត់រឺហាន់បន្លែថ្គាមហើយលាងសម្អាតវា

២.វេចខ្ចប់ថ្គាមជាមួយខ្ទឹមសខ្ទឹមក្រហមម្ទេស និងប្រហុក (ជាមួយស្លឹកចេក) ហើយយកវាទៅអាំង បន្ទាប់មកបុកវាអោយហ្មត់

៣.លាងសម្អាតគល់ស្លឹកគ្រៃហើយហាន់វាជាចំណិតតូចៗបន្ទាប់មកយកវាមកបុកលាយជាមួយថ្គាម 

៤.ក្រោយមកទៀតដាក់ម្សៅស៊ុបចូល

៥.សាច់ផាត់អាចបរិភោគបានជាមួយគ្រឿងផ្សំដែលបុកបញ្ចូលគ្នារឺអាចបុកបញ្ចូលគ្នាទាំងអស់មុននឹងយកមកទទួលទាន

មុខម្ហូបបុកថ្គាមនេះអាចរក្សាទុកបានពីរសប្តាហ៍។ គេនិយមទទួលទានម្ហូបនេះក្នុងអំឡុងរដូវវស្សា។

 (សម្លរម្សៅ)

គ្រឿងផ្សំ	បរិមាណ
សាច់មាន់, សាច់គោ, សាច់ជ្រូក, រឺសាច់ត្រី	៤០០ក្រាម
ស្លឹកផ្តៅ	៣០០ក្រាម
ត្រប់ពុតលំញង	១០០ក្រាម
ស្លឹកត្រួយល្ពៅ	១ដុំ
ស្លឹកម្ទេស	៥០ក្រាម
ស្លឹកបាស	៥០ក្រាម
គល់ស្លឹកគ្រៃ	៤គល់
អង្ករ	៥០ក្រាម
ប្រហុក	៥០ក្រាម
ស្ករស	កន្លះស្លាបព្រាបាយ
អំបិល	មួយស្លាបព្រាបាយ
ម្សៅស៊ុប	កន្លះស្លាបព្រាបាយ
ម្ទេស	២រឺ៣ផ្លែ

វិធីធ្វើ៖

ការរៀបចំសម្រាប់ការចំអិន

១.​​ លាងសាច់អោយបានស្អាត។បន្ទាប់មកស្ងោរវាអោយឆ្អិនហើយបុកអោយហ្មត់​

២.លាងសម្អាតស្លឹកផ្តៅហើយហាន់វាប្រវែង២សង់ទីម៉ែត្រ

៣.ហាន់គល់ស្លឹកគ្រៃជាចំណិតតូចៗរួចបុកវាជាមួយអង្ករ

៤.​​ បុកត្រប់ពុតលំញងអោយហ្មត់

វិធីចម្អិន:

១. ដាំទឹកអោយពុះហើយជញ្រ្ជំប្រហុកដាក់

២.​​ បន្ទាប់មកបង់ស្លឹកផ្តៅ​និងរម្ងាស់វា

៣.​បង់ម្ទេស(ហាន់អោយល្អិត) គ្រឿងផ្សំ​ និងបន្លែ។

​ចុងក្រោយបង់​អំបិលស្ករស​ម្សៅ​ស៊ុបហើយ​ភ្លក់​មើល។

សម្រាប់បងប្អូនជនជាតិពួកគេចូលចិត្តដាក់ស្បែកសត្វព្រៃនិងចម្អិនជាមួយសាច់សត្វព្រៃ

(ណែមត្រី) 

គ្រឿងផ្សំ	បរិមាណ
ត្រី(ត្រីក្អែករឺត្រីក្រាយ)	១គីឡូក្រាម(សាច់ត្រីស្រស់)
រំដេង	២០០ក្រាម
ខ្ទឹមស	៣កំពឹសតូចៗ
អង្ករលីង	១០០ក្រាម
ម្ទេស	១០០ក្រាម
ស្លឹកកន្ទួត	២០០-­‐៤០០ក្រាម
អំបិល	២ស្លាបព្រាកាហ្វេ
ម្សៅស៊ុប	១ស្លាបព្រាបាយ
ស្ករស	២ស្លាបព្រាកាហ្វេ
ស្លឹកចេក	១​ ស្លឹក

វិធីធ្វើ:

១.ពន្លះត្រីកែក ឬត្រីក្រាយយកតែសាច់សុទ្ឋ

២.​ បេះស្លឹកកន្ទួតហើយលាងវាអោយស្អាត

៣.​ បុកអង្ករលីងអោយហ្មត់

វិធីចំអិន:

១. ច្របល់សាច់ត្រីជាមួយរំដេងនិងខ្ទឹមសដោយប្រើវែកបាយដើម្បីអោយសាច់ស្អិតល្អ

២.បន្ទាប់មកដាក់គ្រឿងផ្សំដូចជាអំបិលស្ករសម្សៅស៊ុប និងអង្ករលីងរួចច្របល់វាបញ្ចូលគ្នាប្រហែល១៥នាទី

៣.ចុងក្រោយមូលសាច់ណែមប៉ុនៗមេដៃដាក់ម្ទេសខ្ចប់ក្នុងស្លឹកកន្ទួតរួចវេចខ្ចប់ក្នុងថង់ប្លាស្ទិក។ យើងអាចរុំខ្ចប់ ជាមួយ ស្លឹកចេកជាមុនហើយសឹមច្រកវាក្នុងថង់ប្លាស្ទិកក៏បាន។

៤. រង់ចាំដល់សាច់ណែមចាប់ផ្តើមជូរ(ទុករយះពេល១ទៅ២ថ្ងៃ)ទើបអាចទទួលទានបាន

ចំណាំ៖អ្នកអាចប្រើប្រាស់ក្បាលត្រីក៏បានប៉ុន្តែត្រូវកិនអោយហ្មត់សាច់ជាមុនសិន

(ភ្លាត្រី)

គ្រឿងផ្សំ	បរិមាណ
សាច់ត្រី	៥០០ក្រាម
ទឹកក្រូចឆ្មារ	៣ផ្លែ
ឆៃថាវ	១មើម
សណ្តែកបណ្តុះ	១៥០ក្រាម
សាលាដ	១០០ក្រាម
សណ្តែកដីលីង	១០០ក្រាម
រំដេង	១ស្លាបព្រាបាយ
ខ្ទឹមស	៣កំពឹស​តូច
ស្ករស	២ស្លាបព្រាបាយ
ទឹកត្រី	១ស្លាបព្រាបាយ
អំបិល	កន្លះស្លាបព្រាបាយ
ម្សៅស៊ុប	កន្លះស្លាបព្រាកាហ្វេ
ម្ទេសប្លោក	មួយចំហៀង
ការ៉ុត	១មើម
ត្រសក់	១ផ្លែ
ស្លឹកជី	៥០ក្រាម

                                                                                                                                                                                                                                                                         វិធីធ្វើ:

ការរៀបចំសម្រាប់ការចម្អិន

១.ហាន់សាច់ត្រីរួចច្របាច់ជាមួយទឹកក្រូចឆ្មារ។ចៀនសាច់ត្រីបន្តិចដោយមិនប្រើប្រេង​ដើម្បីអោយ សាច់ត្រី​ស្ងួត។

២.ចិតសម្បកឆៃថាវរួចហាន់វាជាចំណិតស្តើងៗ

៣.កិនសណ្តែកដីអោយហ្មត់

៤.ចិតសម្បករំដេងរួចហាន់វាតូចៗ

៥.កិនខ្ទឹមសអោយហ្មត់ 

៦.លាងសម្អាតម្ទេសប្លោករួចហាន់វា

៧.ចិតសម្បកការ៉ុតរួចហាន់វាល្អិតៗ

៨.លាងសម្អាតសណ្តែកបណ្តុះជីនិងសាលាដ​ រួចស្រក់វាទុកអោយស្រក់ទឹក

៩.លាងសម្អាតផ្លែត្រសក់ហើយហាន់ជាចំណិតស្តើងៗដើម្បីរៀបចំដាក់លើចាន

វិធីចំអិន:

១.​លាយបញ្ចូលត្រីជាមួយរំដេងខ្ទឹមសសណ្តែកដីបន្ទាប់មកលាយគ្រឿងផ្សំដូចជាអំបិលស្ករស​ម្សៅស៊ុប​ទឹកត្រីលាយបញ្ចូលគ្នាអោយសព្វ

២.បន្ទាប់មកដាក់មើមស្ពៃសណ្តែកបណ្តុះម្ទេសប្លោកការ៉ុតនិងជីហើយច្របាច់បញ្ចូលគ្នា។រៀបចំត្រសក់និងសាលាដដែលបាបរៀបចំរួចដាក់ក្នុងចាន

 ចំណាំ៖ភ្លាត្រីជាប្រភេទអាហារឆៅ​ តែអាចចម្អិនបានជាមួយទឹកក្រូចឆ្មារព្រោះទឹកក្រូចឆ្មារ អាចជួយអោយសាច់ត្រីឆ្អិន។មុខម្ហូបនេះមានរសជាតិជូរនិងប្រៃ។វាត្រូវបានទទួលទានជាប្រភេទមុខម្ហូបគ្រឿងក្លែមឬទទួលទានជាមួយបាយ។

 

(ស្ងោរជ្រក់ត្រីប៉ាសេអ៊ី) 

គ្រឿងផ្សំ:

គ្រឿងផ្សំ	បរិមាណ
ត្រីប៉ាសេអ៊ី	៥០០ក្រាម
ក្រូចឆ្មាររឺផ្លែពួន	២ផ្លែ
គល់ស្លឹកគ្រៃ	១គល់
ម្ទេសស្រស់	១ផ្លែ
ទឹកត្រី	១ស្លាបព្រាបាយ
អំបិល	១ស្លាបព្រាបាយ
ម្សៅស៊ុប	កន្លះស្ខាបព្រាកាហ្វេ
ស្លឹកជីរឺជីវ៉ាន់ស៊ុយ	៥០ក្រាម

 ការរៀបចំសម្រាប់ការចម្អិន

១. លាងត្រីអោយស្អាតហើយកាត់វាជាកង់ប្រវែង១០សង់ទីម៉ែត្រ

២.រៀបចំជីហើយលាងសម្អាតអោយបានស្អាត

៣.ចិញ្ច្រាំខ្ទឹមសហើយបំពងជាមួយទឹកម្ទេសដោយដាក់ស្ករត្នោតបន្តិច

៤.លាងក្រូចឆ្មារអោយស្អាតហើយហាន់វា

៥.រៀបចំជីក្រូចឆ្មារអំបិលនិងខ្ទឹមរួចទុកវាមួយឡែក

ការចម្អិន:

១.ដាំទឹកអោយពុះហាន់គល់ស្លឹកគ្រៃរំដេងហើយបង់វាចូល

២.បន្ទាប់មកបង់ត្រីចូលទុកអោយពុះរួចដាក់អំបិលទឹកត្រីនិងម្សៅស៊ុប

ចុងក្រោយដួសសម្លរដាក់ចានបង់ស្លឹកជីម្ទេសនិងច្របាច់ក្រូចឆ្មារឬដាក់ផ្លែពួន។

 

(កូយឬសេក)

គ្រឿងផ្សំ	បរិមាណ
សាច់ជ្រូកជាប់ស្បែក(អាចលាយជាមួយ​បេះដូង​ជ្រូក, ថ្លើមជ្រូក, ឬពោះវៀនជ្រូកបើសិនត្រូវការ)	៤០០ក្រាម
ឈាមជ្រូកស្រស់	៣០០ -​ ៤០០មីលីលីត្រ
គល់ស្លឹកគ្រៃ	៥ -៧ដើម
រំដេង	មួយដុំធំ
ខ្ទឹមស	១កំពឹស
ខ្ទឹមក្រហម	៣កំពឹស
ក្រូចឆ្មារ	៣ - ៤ផ្លែ
ប្រហុក	៥០ក្រាម
អង្ករលីង	៥០ក្រាម
អំបិល	១ស្លាបព្រាបាយ
ម្សៅស៊ុប	កន្លះស្លាបព្រាកាហ្វេ
ស្ករស	កន្លះស្លាបព្រាកាហ្វេ
បន្លែ
ស្ពៃក្តោប	១ចំហៀង
ជីគ្រប់មុខ	១០០ក្រាម
សណ្តែកគួរ	៥០ក្រាម
ត្រប់សណ្តាយ	១ផ្លែ
ត្រប់ស្រួយ	៥ផ្លែ

វិធីធ្វើ៖

ការរៀបចំសម្រាប់ការចម្អិន

១. ដុតរំដេងខ្ទឹមសនិងខ្ទឹមក្រហមរួចបុកវាបញ្ចូលគ្នាទុកមួយឡែក

២. លាងសម្អាតគល់ស្លឹកគ្រៃនិងហាន់វាចំណិតស្តើងៗ

៣. ដាំទឹកអោយពុះចិញ្ច្រាំប្រហុកដាក់ដើម្បីអោយចេញជាតិដោយស្រង់យកឆ្អឹងចេញ

៤. កាត់យកស្បែកជ្រូកចេញពីសាច់​ ដើម្បីយកស្បែកទៅស្ងោរនិងហាន់ជាចំណិតចំណែកសាច់ជ្រូក

ទៅសម្រាប់ចិញ្រ្ចាំ

៥. លាងសម្អាតជីគ្រប់មុខនិងបន្លែ​ បន្ទាប់មកហាន់ជីចំណិតតូចៗល្មម

៦. លាងប្របាច់ឈាមជ្រូកស្រស់ហើយត្រងយកកាកដើម្បីលាយជាមួយសាច់ជ្រូកចិញ្រ្ចាំ

វិធីចម្អិន៖

១. លាយបញ្ចូលឈាមជ្រូកជាមួយសាច់ជ្រូកចិញ្រ្ចាំលាយទឹកក្តៅបន្តិចរួចកូរវាជាមួយស្បែកជ្រូកដែលស្ងោរឆ្អិន។បន្ទាប់មកដាក់រំដេងខ្ទឹមសគល់ស្លឹកគ្រៃទឹកប្រហុកស្ករសអំបិលម្សៅស៊ុបទឹកក្រូចឆ្មារហើយច្របល់វាបញ្ចូលគ្នា។

២. ចុងក្រោយទទួលទានជាមួយបន្លែស្រស់ដែលយើងបានរៀបចំរួចរាល់។

 

(ឡាបត្រី)

គ្រឿងផ្សំ៖

គ្រឿងផ្សំ	បរិមាណ
ត្រីក្រាយឬស្លាត (ពន្លះយកតែសាច់)	៤០០ក្រាម
គល់ស្លឹកគ្រៃ	១០ដើម
រំដេង	១ដុំធំ
អង្ករលីង (លីងរហូតឡើងពណ៌ខ្មៅ)	៥០ក្រាម
ម្ទេស	៣ផ្លែ
ខ្ទឹមស	១កំពឹស
ខ្ទឹមក្រហម	៣កំពឹស
ស្ករស	កន្លះស្លាបព្រាបាយ
អំបិល	១ស្លាបព្រាបាយ
ម្សៅស៊ុប	កន្លះស្លាបព្រាកាហ្វេ
បន្លែ
ពពាយ	១០ផ្លែ
សណ្តែកគួរ	៥០ក្រាម
ត្រប់ពុតលំញង	៥០ក្រាម
ត្រប់ស្រួយ	៥ផ្លែ
ត្រប់សណ្តាយ	១ផ្លែ
ត្រយូងចេក	មួយចំហៀង
ស្ពៃក្តោប	១ចំហៀង
ជីគ្រប់មុខ	១០០ក្រាម
បន្លែភ្លៅកង្កែបឬប្រភេទបន្លែដ៏ទៃទៀត	១០០ក្រាម

វិធីធ្វើ៖

ការរៀបចំសម្រាប់ការចម្អិន

១. លីងអង្កររហូតអង្ករឡើងពណ៌ខ្មៅតែកុំរំលីងយូរខ្លាំងពេកបន្ទាប់មកចាក់វាចូលក្នុងទឹកក្តៅដើម្បីយកទឹករបស់វា

២. លាងសម្អាតគល់ស្លឹកគ្រៃរួចហាន់វាជាចំណិតស្តើងៗ

៣. ដុតរំដេងខ្ទឹមសនិងខ្ទឹមក្រហមរួចហាន់វានិងបុកបញ្ចូលគ្នា

៤. លាងសម្អាតជីគ្រប់មុខបន្ទាប់មកហាន់ជីជាចំណិតតូចៗល្មម

៥. ដាក់ដាំទឹកអោយពុះចិញ្ច្រាំប្រហុកដាក់ដើម្បីយកជាតិប្រហុកដោយស្រង់យកឆ្អឹងត្រីប្រហុកចេញ

វិធីចម្អិន៖

១.ចិញ្រ្ចាំសាច់ត្រីក្រាយឬសាច់ត្រីស្លាតដើម្បីអោយហ្មត់ឆ្អឹងអស់បន្ទាប់មកចាក់ទឹកក្តៅឬទឹកស្ងោរត្រីច្របល់​ជាមួយ​សាច់ត្រី​ចិញ្រ្ចាំ។ចាក់ទឹកអង្ករលីងនិងទឹកប្រហុកចូល។

២. ដាក់រំដេងខ្ទឹមបុកអំបិលម្សៅស៊ុបនិងទឹកប្រហុកបន្ទាប់មកច្របល់ចូលគ្នា។ ក្រោយមកទៀត ដាក់គល់​ស្លឹក​គ្រៃ​និងជីដែលហាន់រួច

៣. ចុងក្រោយទទួលទានជាមួយបន្លែដែលបានរៀបចំរួចរាល់។

ចំណាំ៖ពេលច្របល់សាច់ត្រីជាមួយទឹកក្តៅឬជាមួយទឹកស្ងោរត្រីនិងទឹកអង្ករលីងយើងគួរដាក់ទឹកម្តងបន្តិចដើម្បីជៀសវាងសាច់ត្រីមានទឹករាវពេក។ 

(នំបញ្ចុកសម្លរការី)

 

គ្រឿងផ្សំ៖

គ្រឿងផ្សំ	បរិមាណ
សាច់មាន់ឬសាច់ជ្រូកឬសាច់គោឬឆ្អឹងជំនីរ	១គីឡូក្រាម(រើសយកមាន់ចាស់)
ត្រប់ (ត្រប់សណ្តាយឬត្រប់ជើងគោ)	១គីឡូក្រាម
ម្ទេសគ្រៀម	៥០ក្រាម
ស្លឹកក្រូចសើច	១០សន្លឹក
ប្រហុកខ្មែរឬសាច់បង្គារកិន	១ស្លាបព្រាបាយ
រំដេង	១ដុំតូច
គ្រឿងបុក	១០០ក្រាម
ខ្ទឹមក្រហម	២០០ក្រាម
ខ្ទឹមស	២០០ក្រាម
ទឹកខ្ទិះដូង	១លីត្រ
សណ្តែកគួរ	៥០០ក្រាម
សណ្តែកដី	២០០ក្រាម
គ្រឿងការី	១កញ្ចប់
ផ្កាច័ន្ទ	៥០ក្រាម
ខ្ទឹមបារាំង	៥០០ក្រាម
ដំឡូងបារាំងឬដំឡូងជ្វា	១គីឡូក្រាម
អំបិល	១ស្លាបព្រាកាហ្វេ
ស្ករស	១០០ក្រាម
ទឹកត្រី	៣ស្លាបព្រាកាហ្វេ
ម្សៅស៊ុបខ្នរ	១ស្លាបព្រាកាហ្វេ
ជីគ្រប់មុខ	១០០ក្រាម
បន្លែ (ស្ពៃក្តោបត្រយ៉ូងចេកសណ្តែកបណ្តុះសណ្តែកគួរផ្កាស្នោនិងស្លឹកកន្ធុំថេត)	៥០០ក្រាម
នំបញ្ចុក	២គីឡូក្រាមកន្លះ

វិធីធ្វើ៖

ការរៀបចំសម្រាប់ការចម្អិន

១. លាងសម្អាតសាច់មាន់សាច់ជ្រូកសាច់គោឬឆ្អឹងជំនីរអោយបានស្អាតបន្ទាប់មកកាត់ជាដុំៗ

២. វាល់ទឹកខ្ទិះដូងដើមមួយកូនចានបន្ទាប់មកពូតយកទឹកខ្ទិះដូងចុងទុក

៣. ត្រាំម្ទេសក្រៀមក្នុងទឹកបន្ទាប់មកយកវាមកចិញ្រ្ចាំ។​កាត់និងលាងផ្កាច័ន្ទរួចទុកវាមួយឡែកសិន

៤. លីងសណ្តែកដីនិងបកសម្បកវាចេញ

៥.លាងសម្អាតគល់ស្លឹកគ្រៃស្លឹកក្រូចសើចរំដេងបន្ទាប់មកហាន់វាជាចំណិតតូចៗ។ បន្ទាប់មកបុកបញ្ចូលគ្រឿងផ្សំទាំងនោះ ជា មួយខ្ទឹមក្រហមខ្ទឹមសនិងទុកវាមួយឡែក

បន្លែ៖លាងសម្អាតដំឡូងដំឡូងជ្វាសណ្តែកគួរខ្ទឹមបារាំងត្រប់ឬត្រប់ជើងគោនិងហាន់វាតាមចំណូលចិត្តអ្នកបរិភោគ

សម្រាប់ស្ពៃ៖ លាងសម្អាតស្ពៃក្តោបត្រយ៉ូងចេកសណ្តែកបណ្តុះសណ្តែកគួរផ្កាស្នោស្លឹកកន្ធុំថេត និងជីគ្រប់មុខ។​ ដាក់វា អោយស្រក់ទឹករួចហាន់វាជាចំណិតស្តើងៗ

វិធីចម្អិន៖

១. ដាក់ឆ្នាំងអោយក្តៅដើម្បីដាំទឹកខ្ទិះដូងបន្ទាប់មកចិញ្រ្ចាំម្ទេសក្រៀម។បង់សាច់បង្គារហ្មត់ឬប្រហុករួចដាក់គ្រឿងដែលបុករួចគ្រឿងការីនិងសាច់។ កូរគ្រឿងផ្សំទាំងនោះអោយសព្វល្អបន្ទាប់មកបង់អំបិល ទឹកត្រី ស្ករត្នោត និង ម្សៅស៊ុបខ្នរ។ ដាក់រម្ងាស់វារហូតដល់ផុយសាច់។

២. បន្ទាប់មកភ្លក់មើលអោយល្មមចាក់ទឹកខ្ទិះដូងដើមចូលទុកអោយពុះ។

៣.​ចុងក្រោយដាក់សណ្តែកដី។ ពេលសម្លរឆ្អិនយើងអាចទទួលទានជាមួយនំបញ្ចុកឬនំប៉័ងជាមួយបន្លែដែលបានរៀបចំ​រួច​រាល់។