រមណីយដ្ឋានធម្មជាតិទឹកធ្លាក់ថ្មក្រាល ជាតំបន់ទេសចរណ៍មួយដែលភ្ញៀវទេសចរអាចទៅទស្សនា និង​លំហែកាយកម្សាន្តបានតាមដំណាក់ទឹកធ្លាក់នីមួយៗ។ តំបន់នេះមានទេសភាពព្រៃឈើខៀវខ្ចី មានភ្នំធម្មជាតិនៅហ៊ុមព័ទ្ធជុំវិញ។ នារដូវវស្សាយើងឃើញថាមានវាលស្រែចម្រុះពណ៌មានបៃតង និងមាស មានផ្ទាំងថ្មធំៗជាច្រើន អមជាមួយដើមឈើតូចធំជាច្រើន មានទឹកថ្លាត្រជាក់ ដែលធ្លាក់ពីលើភ្នំឱរ៉ាល់។ ជាពិសេសមាន ដើមឫស្សីព្រិច ដែលដុះនៅទីនោះមានរាងកោងៗ ជារង្វង់ស្វ៊ែរ។ នាពេលយប់ មានប្រភេទផ្សិតម្យ៉ាង ដែលចេញពន្លឺផ្លេកៗ អមដោយស្នូរទឹកហូរ ថែមទាំងមានសម្លេងសត្វព្រៃយំ គួរឱ្យនឹកស្រម៉ៃមិនជិនណាយ។