ឧទ្យានជាតិព្រះមុនីវង្ស បូកគោ គឺជាឧទ្យានមួយក្នុងចំណោមឧទ្យានជាតិដ៏ស្រស់ស្អាតរបស់ព្រះរាជាណាចក្រកម្ពុជា។ ឧទ្យានជាតិនេះល្បីឈ្មោះដោយសារតែអាកាសធាតុត្រជាក់ពេញមួយឆ្នាំ និងសម្រស់ព្រៃព្រឹក្សាធម្មជាតិដ៏ស្រស់បំព្រងល្អឯកគ្មានគូប្រដូចក្នុងតំបន់។ នៅលើកំពូលភ្នំ ភ្ញៀវទេសចរអាចគយគន់ទិដ្ឋភាពនៃទិដ្ឋភាពទីក្រុងកំពត ឆ្នេរសមុទ្រកែប ខេត្តព្រះសីហនុ និងកោះជាច្រើនដែលនៅខាងក្រោម។ ភ្នំបូកគោ ត្រូវបានរកឃើញនៅឆ្នាំ1917 ដោយជនជាតិបារាំង និងត្រូវបានអភិវឌ្ឍឱ្យទៅជារមណីយដ្ឋាននៅឆ្នាំ1921 ក្នុងរជ្ជកាលព្រះបាទស៊ីសុវត្ថិ។ នៅអំឡុងពេលនោះ ភ្នំបូកគោ គឺជាទីកន្លែងកម្សាន្តដ៏ល្បីល្បាញសម្រាប់អភិជនបារាំងនិងរាជវង្សានុវង្ស។ ភ្នំបូកគោ ត្រូវបានដាក់ឈ្មោះថាជាឧទ្យានជាតិព្រះមុនីវង្សបូកគោដោយព្រះរាជក្រឹត្យកាលពីឆ្នាំ1993 ដែលមានផ្ទៃក្រឡា 1400គីឡូម៉ែត្រការេ។