រមណីយដ្ឋានជ្រលងបុព្វតា ជារមណីយដ្ឋានធម្មជាតិមួយដែលមានទេសភាពស្រស់បំព្រង ហើយភ្ញៀវទេសចរអាចទស្សនាសួនផ្កា​ និងដើមឈើច្នៃជារូបសត្វផ្សេងៗ។ អ្នកភ្ញៀវទេសចរអាចកម្ម៉ង់អាហារ យកទៅញុំានៅក្រោមដើមស្វាយ និងងូតទឹកហូរកម្សាន្តផងដែរ។ អ្វីដែលពិសេសនៅក្នុងតំបន់នេះគឺ អ្នកទេសចរនឹង​ជក់ចិត្ត​ជា​មួយ​នឹង​បណ្តុំ​​ទេស​ភាព​ស្រស់​ត្រកាល ដែល​អមទៅ​ដោយ​ដី​ចម្ការ​​ស្វាយ​​ និង​រុក្ខជាតិ​ផ្សេងៗ​ទៀត ​នៃផ្ទៃ​ដី​ទំហំ 12​ហិក​តា និង​​មាន​ទឹកហូរ​​ខួប​ប្រាំង​ខួប​វស្សា ​ដែល​អាច​ចុះងូត​លេង​កម្សាន្ត​បាន​យ៉ាង​សប្បាយ​ចិត្ត​ពេល​ទៅ​ដល់​រមណីយ​ដ្ឋាន​ធម្មជាតិ​ជាមួយនឹងការ​កែច្នៃ។ រមណីយដ្ឋានជ្រលងបុព្វតា មានចម្ងាយប្រហែល 56គឺឡូម៉ែត្រ ពីទីរួមខេត្តបាត់ដំបង ដោយយើងធ្វើដំណើរចេញពីទីរួមខេត្តឆ្ពោះទៅកាន់ផ្លូវលេខ 57 ឆ្លងកាត់ស្រុករតនមណ្ឌល និងបន្តមករហូតមកដល់ភូមិផ្អាវបត់ឆ្វេងឆ្លងកាត់ទំនប់ទឹកសេកសកបន្តិចនឹងមកដល់គោលដៅប្រហែល 1ម៉ោង។