ប្រាសាទតាញាណខាងកើត (ប្រាសាទនាងសក់ក្រអូប) មានទីតាំងស្ថិតនៅលើកំពូលភ្នំ ត្រូវបានកសាងឡើងអំពីឥដ្ឋ មានរាងចតុកោណកែង មានទំហំ 4ម៉ែត្រ គុណ 3.5ម៉ែត្រ និងកម្ពស់ប្រហែល 10ម៉ែត្រ បែរមុខទៅទិសខាងកើត និងត្រូវបានគេសន្និដ្ឋានបានថា ប្រហែលជាកសាងដំណាលគ្នានឹងប្រាសាទភ្នំបាយ៉ង់ដែរ(សម័យអាណាចក្រចេនឡា) សម្រាប់ឧទ្ទិសដល់ព្រហ្មញ្ញសាសនា។ ទីតាំងប្រាសាទហ៊ុមព័ទ្ធដោយទេសភាពយ៉ាងស្រស់បំព្រង លាយឡំគ្នាជាមួយនឹងថ្មតូចធំ រុក្ខជាតិផ្សេងៗ ហើយបើមើលពីលើភ្នំវិញគឺមានទេសភាពយ៉ាងខៀវស្រងាត់អមទៅដោយភ្នំព័ទ្ធជុំវិញ ព្រមទាំងមើលឃើញទិដ្ឋភាពនៃការរស់នៅរបស់ប្រជាជននៅក្នុងតំបន់នោះយ៉ាងច្បាស់។